–260 जणांना नोटीस, 31 डिसेंबरला होणार सुनावणी
केशव कदम । बीड
दि.28 ः बीडमध्ये 16 गुन्हे नोंद असलेल्याकडेही शस्त्र परवाना.. या मथळ्याखाली दैनिक कार्यारंभमध्ये वृत्त प्रकाशित करण्यात आले होते. तसेच जिल्ह्यातील 260 जणांवर गुन्हा दाखल असून त्यांचा परवाना रद्द करण्याबाबत पोलीस प्रशासनानेही जिल्हा प्रशासनाकडे प्रस्ताव पाठवला होता. मात्र जिल्हा प्रशासनाकडून हे परवाने रद्द करण्यासाठी चालढकल केली जात होती. अखेर 26 डिसेंबर रोजी जिल्ह्यातील गुन्हे नोंद असलेल्या तब्बल 260 जणांना नोटीस देण्यात आली आहे. त्यामुळे हे शस्त्र परवाने रद्द होणार असल्याचे दिसत आहे.
8 डिसेंबर रोजी दैनिक कार्यारंभने प्रकाशित केलेले वृत्त…
अप्पर जिल्हादंडाधिकारी शिवकुमार स्वामी यांनी गुन्हे दाखल असलेल्या 260 शस्त्र परवानाधारकांना काढलेल्या नोटीसमध्ये म्हटले आहे की, पोलीस अधीक्षक यांचे पत्रान्वेय गुन्हे दाखल असलेल्यांची माहिती कार्यालयास प्राप्त झाली आहे. आपल्यावर गुन्हा दाखल असल्यामुळे शस्त्र अधिनियम 1959 मधील तरतुदीनुसार देण्यात आलेला शस्त्र परवाना रद्द का करण्यात येऊ नये याचा खुलासा 31 डिसेंबर रोजी सकाळी जिल्हाधिकारी तथा जिल्हादंडाधिकारी यांचे समक्ष उपस्थित राहून सादर करावा, अन्यथा आपले काही म्हणणे नाही असे समजून नियमानुसार पुढील कार्यवाही करण्यात येईल याची नोंद घ्यावी.. अशी नोटीस शस्त्र परवानाधारकांना देण्यात आली आहे. (Notice)
23 डिसेंबर रोजी दैनिक कार्यारंभने प्रकाशित केलेले वृत्त…
लायकी नसणार्यांना शस्त्र परवाना दिला,
सगळ्यांची चौकशी करा-आ.सुरेश धस
आजपर्यंत बीड जिल्ह्यात 1 हजार 281 शस्त्र परवाने देण्यात आले. ज्याची लायकी नाही त्यालाही परवाना दिलेला आहे. कशासाठी एवढे शस्त्र वाटप केले असा सवाल उपस्थित करत आ.सुरेश धस यांनी हे शस्त्र देण्यासाठी शिफारस करणार्यांचा शोध घ्यावा व ज्या जिल्हाधिकारी, पोलीस अधीक्षक व संबंधित अधिकार्यांच्या काळात हे शस्त्र परवाने देण्यात आले त्यांची चौकशी करावी, अशी मागणी आ.धस यांनी केली आहे.
