jp nadda and devendra fadnavis

कोणाचीही सोबत नको, मदतही नको, प्रत्येक ठिकाणी कमळ दिसण्यासाठी कामाला लागा- जे.पी.नड्डा

न्यूज ऑफ द डे राजकारण

भाजपाध्यक्ष जे.पी.नड्डा यांच्या महाराष्ट्रातील पदाधिकार्‍यांना सुचना

मुंबई : पुढच्या वेळी एकट्याने महाराष्ट्र सांभाळण्याची आपली तयारी असली पाहिजे. याची तयारी आजपासूनच आपल्याला करायची आहे. कोणाचीही सोबत नाही, मदत नाही असा संकल्पच केला पाहिजे. एकटी भाजपा महाराष्ट्रात कमळ आणणार, प्रत्येक ठिकाणी कमळ असेल यासाठी कामाला लागा. पक्षाचा प्रत्येक उमेदवार जिंकेल यासाठी प्रयत्न करा, असं भाजपाध्यक्ष जे.पी. नड्डा म्हणाले.

पक्षाच्या कार्यकारिणी बैठकीत व्हिडीओ कॉन्फरन्सिंगच्या माध्यमातून त्यांनी आज महाराष्ट्रातील पदाधिकार्‍यांशी संवाद साधला. बैठकीत माजी मुख्यमंत्री देवेंद्र फडणवीस, भाजपा प्रदेशाध्यक्ष चंद्रकांत पाटील हजर होते. पुढे ते म्हणाले, महाराष्ट्रात आगामी काळात कोणाचीही मदत न घेता सरकार आणण्याच्या तयारीला लागा. भाजपाने आपला विस्तार करण्यावर लक्ष दिलं पाहिजे. शिवसेना, काँग्रेस आणि राष्ट्रवादीने आपल्या स्वार्थासाठी एकत्र येऊन सरकार स्थापन केलं आहे. भाजपा वारंवार त्यांना उघडं पाडत आहे. निर्लज्जपणे आणि स्वार्थासाठी हे सरकार चालवलं जात आहे. सरकारमध्ये अंतर्विरोध आहे. करोनाची परिस्थिती हाताळण्यास सरकार अपयशी ठरलेलं असून हे लोकांसमोर आणलं पाहिजे. कोविडची स्थिती हाताळतानाही त्यांनी घोटाळा केल्याचं मला कळालं आहे, असा गंभीर आरोप जे.पी.नड्डा यांनी केला आहे.

तुम्ही एकमेकांच्या तंगड्या तोडण्यास सक्षम आहात -देवेंद्र फडणवीस

देवेंद्र फडणवीस यांनीदेखील राज्य सरकारवर टीका केली आहे. आपल्या अपयशावरुन लक्ष हटवण्यासाठी वारंवार सरकार पाडण्याचा प्रयत्न असल्याचं तुणतुणं वाजवलं जात आहे. आम्हाला सरकार पाडण्यात रस नाही. तुम्ही एकमेकांच्या तंगड्या तोडण्यास सक्षम आहात. अंतर्विरोधानेच सरकार पडणार आहे. त्यानंतर महाराष्ट्राचे भवितव्य काय ठरवून दाखवू. हे जनतेने निवडून दिलेलं सरकार नाही. हे बेईमानीने आलेलं सरकार आहे. जनेतेने आम्हाला आणि सोबत असणार्‍या पक्षांना निवडून दिलं होतं, असं यावेळी देवेंद्र फडणवीस यांनी सांगितलं. भाजपाचा डीएनए संघर्षाचा असून जनतेसाठी संघर्ष करत राहू असंही ते म्हणाले आहेत.

कार्यारंभ आता टेलीग्रामवर आहे. आमचं चॅनेल (@karyarambhbeed) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.