एक गंभीर जखमी; बीड परळी महामार्गावरील घटना
बीड दि.16 : बीड-परळी महामार्गावर परळीकडून भरधाव वेगात येणार्या स्वीप्ट डिझायर गाडीची बाभळीच्या झाडाला जोरात धडक बसली. या अपघातात दोघांचा जागीच मृत्यू झाला तर एक जण गंभीर जखमी झाल्याची दुर्दैवी घटना रविवारी (दि.16) दुपारी तेलगाव येथे घडली. हा अपघात एवढा भीषण व ह्रदयद्रावक होता की यात गाडीचा पुर्ण चक्काचुर होऊन, मयत व जखमींना जेसीबीच्या सहायाने बाहेर काढण्यात आले.
नांदेड जिल्ह्यातील भोकर येथील तीन तरूण रविवारी (एम. एच.13 सीके 0441) स्वीप्ट डिझायर गाडीने भोकर येथून तेलगाव मार्गे बीडला जात होते. तेलगाव येथे परळी रोडवर असलेल्या अमर बिअरबारजवळ सदर गाडी आली असता चालकाचा ताबा सुटल्याने गाडी रोडच्या लगत खड्यात असलेल्या बाभळीच्या झाडाला जाऊन धडकली. गाडी एवढ्या जोरात धडकली की गाडीचा अक्षरशः चुराडा झाला. या अपघातात चालक व चालकाच्या बाजूच्या सिटवर बसलेला तरूण जागीच ठार झाले. मागच्या सिटवर बसलेला तरूण समोरच्या व मागच्या सिटमध्ये अडकला. मयतामध्ये युसूफ शेख (27), सचिन मोकमपल्ले (29 दोघे रा.भोकर जि.नांदेड) यांचा समावेश असल्याचा अंदाज वर्तवला जात आहे. अमोल वाघमारे हा तरूण गंभीर जखमी आहे. गावालगतच अपघात झाल्याने अमर बिअरबारचे मालक कांता पाटील लगड हे इतर नागरिकांना घेऊन तात्काळ घटनास्थळी गेले. अपघात झाल्याचे समजताच नागरिक मोठ्या संख्येने जमा झाले. घटनास्थळी जमलेल्या नागरिकांनी गाडीतील लोकांना बाहेर काढण्यासाठी शर्तीचे प्रयत्न केले. परंतु ते बाहेर काढता येत नव्हते. त्यामुळे गॅस वेल्डिंगने वेल्डिंग करून, एका मयतास बाहेर काढले. तर जखमी व अन्य एका मयतास जेसीबीच्या सहायाने पोलीस कर्मचारी व नागरिकांनी बाहेर काढले. यानंतर मयत व जखमींना 108 रूग्ण वाहिकेने रूग्णालयात दाखल करण्यात आले. यावेळी पोलीस कर्मचारी अनिल भालेराव, बालाजी सुरेवाड तसेच जेसीबी मालक मच्छिंद्र माने तसेच शेकडो नागरिकांनी माणुसकी दाखवत गाडीतील मयत व जखमींना बाहेर काढण्यासाठी शर्तीचे प्रयत्न करून बाहेर काढत एका जखमी तरूणाचा जीव वाचला.
