मुंबई : गँगस्टर दाऊद इब्राहिमसह त्याच्या पत्नीला करोनाचा संसर्ग झाल्याचे वृत्त सीएनएन न्यूज 18 ने दिलं आहे. दाऊदबरोबरच त्याच्या पत्नीलाही करोनाचा संसर्ग झाला असल्याचे पाकिस्तानमधील सरकारी अधिकार्यांच्या हवाल्याने सांगण्यात येत आहे.
पाकिस्तानमधील गुप्तचर यंत्रणेचे अधिकारी दाऊदला करोना झाल्यामुळे संभ्रमात पडले असून दाऊदला कराचीमधील लष्कराच्या रुग्णालयात भरती करण्यात आल्याचे समजते. दाऊद आणि त्याच्या पत्नीची करोना चाचणी पॉझिटीव्ह आल्यानंतर त्यांच्या घरातील सुरक्षारक्षक आणि कर्मचार्यांना क्वारंटाइन करण्यात आल्याचा दावा सुत्रांच्या हवाल्याने करण्यात आला आहे. अंडरवर्ल्ड डॉन दाऊद इब्राहिम हा सध्या पाकिस्तानात नसल्याची माहिती ब्रिटनमधील एका न्यायालयाला मागील वर्षी पाकिस्तानच्या परराष्ट्र कार्यालयाने दिली होती. मात्र आता दाऊदला करोना झाला असून त्याच्यावर कराचीमधील लष्करी रुग्णालयामध्येच उपचार सुरु असल्याचे सीएनएनचे म्हणणे आहे. मागील अनेक वर्षांपासून दाऊदला आम्ही आश्रय दिला नाही असं पाकिस्तान सांगत असतानाच आता त्याला करोनाचा संसर्ग झाल्याने रुग्णालयात दाखल करण्यात आल्याचे पाकिस्तानचा खोटारडेपणा उघड झाला आहे. दहा दिवसांपूर्वीच दाऊद लष्कर ए तोयबाच्या काही लोकांना भेटल्याचेही या वृत्तामध्ये नमूद करण्यात आलं आहे. तो काही दिवसांपूर्वीच इस्लामाबादमधून कराचीमध्ये आल्याचे सांगण्यात येत आहेत. त्यामुळे आता दाऊदच करोना पॉझिटीव्ह असल्याची माहिती समोर येत असल्याने मागील काही दिवसांमध्ये तो ज्या ज्या व्यक्तींना भेटला आहे त्यांची तपासणी करावी लागणार असल्याचे वृत्तवाहिनीनं म्हटलं आहे. असं झाल्यास जगभरामध्ये मोस्ट वॉण्टेड असणार्या दाऊदला पाकिस्ताननेच मागील 25 वर्षांपासून अधिक काळ आसरा दिल्याचे उघड होईल असं सांगण्यात येत आहे.