आरोग्यमंत्री राजेश टोपे यांचा निर्णय
प्रतिनिधी । मुंबई
दि.24 : सप्टेंबर 25 आणि सप्टेंबर 26 रोजी होणार्‍या परीक्षा अखेर रद्द करण्यात आल्याची घोषणा राज्याचे आरोग्यमंत्री राजेश टोपे यांनी केली. आरोग्य विभागाच्या भरती प्रक्रियेत मोठ्या प्रमाणावर लागलेल्या बोलीच्या चर्चा आणि ज्या कंपनीकडे या परिक्षेचे कंत्राट देण्यात आले होते. त्या कंपनीतील अवमेळ आदी कारणे याला कारणीभूत ठरली आहेत.
राज्याच्या आरोग्य विभागात विविध पदांसाठी भरती प्रक्रिया सुरु असून त्यासाठी उद्या आणि परवा होणार होत्या. मात्र या परिक्षेपूर्वीच अनेक गोंधळ समोर आले होत. शुक्रवारपर्यंत अनेक विद्यार्थ्यांचे प्रवेशपत्रच उपलब्ध होत नव्हते. तर अनेक जिल्ह्यात या पदांसाठी दहा ते पंधरा लाखाची बोली लावली गेल्याची चर्चा होती. त्यातच वेगवेगळ्या जिल्ह्यात परिक्षांचे वेळापत्रक वेगवेगळे ठेवण्यात आल्याचेही समोर आले होते. ज्या कंपनीकडे परिक्षा घेण्याचे कंत्राट देण्यात आले आहे. त्या कंपनीने प्रश्नपत्रिका वितरीत करण्यासाठी आणखी एका कंपनीला पोट कंत्राट दिल्याचा प्रकारही समोर आला होता. या सार्‍या प्रकारामुळे या परिक्षांच्या पारदर्शकतेवर प्रश्नचिन्ह लागले होते. या सार्‍या पार्श्वभूमीवर आता या परिक्षा रद्द करण्यात आल्याचा निर्णय आरोग्यमंत्री राजेश टोपे यांनी जाहीर केला. मात्र स्थानिक अधिकारी अजूनही या संदर्भातील अधिकृत निर्णयाची वाट पहात असून जोपर्यंत कागदोपत्री आदेश येत नाहीत तोपर्यंत आम्ही काही बोलू शकत नाही अशी भूमिका प्रशासनाने घेतली आहे.
