लोकनेत्याच्या जयंतीदिनी मुंडे भगिनींनी केली कष्टकरी, कामगारांची सेवा
प्रतिनिधी । परळी
दि. 12 : भाजपच्या राष्ट्रीय सचिव पंकजाताई मुंडे आणि खा. डॉ. प्रितमताई मुंडे यांनी लोकनेते गोपीनाथराव मुंडे साहेबांची जयंती आज खर्‍या अर्थाने साजरी केली. आजचा संपूर्ण दिवस त्यांनी कष्टकरी, कामगारांच्या सेवेत घालवला. पंकजाताईंनी ऊसतोड मजूरांसोबत ऊसाची मोळी उचलली तर खा. प्रितमताईंनी वीट भट्टीवर जाऊन कामगारांसोबत काम केले, त्यांचेच अनुकरण करत राज्यभरातील कार्यकर्त्यांनी त्यांनी केलेल्या आवाहनानुसार ’सेवेचा संकल्प’ करत ठिक ठिकाणी कष्टकर्‍यांची सेवा केली.
लोकनेते मुंडे साहेब यांची जयंती आज गोपीनाथ गडावर तसेच जिल्हयात विविध सामाजिक उपक्रमांनी साजरी झाली. आजच्या दिवशी कष्टकर्‍यांच्या ‘सेवेचा संकल्प’ पंकजाताई मुंडे यांनी जाहीर केला होता, त्यानुसार कार्यकर्त्यांनी राज्यभरात ठिक ठिकाणी सामाजिक उपक्रम हाती घेतले होते.
पंकजाताई व प्रितमताईंनी गोपीनाथ गडावर स्वतः रक्तदान केले, कोविड लसीकरणही राबवले तसेच कार्यकर्त्यांशी संवाद साधला. त्यानंतर पंकजाताई थेट गोवर्धन गावातील एका शेतकर्‍याच्या ऊसाच्या फडावर गेल्या, त्याठिकाणी ऊसतोड मजूरांची भेट घेतली, त्यांची आस्थेवाईकपणे चौकशी करत स्वतः त्यांच्या बरोबरीने ऊसाची मोळी उचलून वाहनात टाकण्यास त्यांना मदत केली. नंतर मजूरांच्या पालावर जाऊन महिलांची भेट घेऊन त्यांची साडी-चोळी देऊन ओटी भरली. एवढेच नव्हे तर त्यांच्यासाठी घरून आणलेला जेवणाचा डबा काढून त्यांच्या परिवारासमवेत भाजी, भाकरी, चटणीचा आस्वाद घेतला, त्यांच्या या आगळ्या वेगळ्या सेवेने कामगार व त्यांचे कुटुंबीय भारावून गेले होते.
अन् प्रितमताई पोहोचल्या वीट भट्टीवर
एकीकडे पंकजाताई ऊसतोड कामगारांसोबत असताना दुसरीकडे खा. डॉ. प्रितमताई मुंडे टोकवाडीच्या एका वीट भट्टीवर पोहोचल्या आणि तिथे त्यांनी मजूरांसोबत वीटा तयार केल्या, त्यांची विचारपूस केली तसेच सोबत भोजनही घेतले. आजचा संपूर्ण दिवस कष्टकर्‍यांच्या सेवेत घालवून त्यांच्यासाठी काही करता आले, यापेक्षा दुसरा कोणताही आनंद मोठा नाही अशी प्रतिक्रिया त्यांनी यावेळी दिली.
